ALIÇKAJ: GRENELLI NUK E PËRFAQËSON AMERIKËN NË ÇËSHTJE TË KOSOVËS
Agim ALIÇKAJ, veprimtar shqiptaro-amerikan, anëtar i kryesisë së Ligës Shqiptaro-Amerikane, me Joe Dioguardin foli në televizionin KTV (3 shkurt 2025):
«Deklarata e sotme e Grenellit është përzierje flagrante në punët e brendshme të Republikës së Kosovës. Ky veprim është një veprim antiamerikan, një veprim që nuk i ka hije një emisari, i cili pretendon se mund të zgjidhë konflikte. Konfliktet nuk zgjidhen duke kritikuar njërën anë, me të cilën ti dëshiron të arrish ndonjë sukses në bisedime.
Grenelli nuk e përfaqëson shtetin amerikan në çështje të Kosovës. Ende nuk asht caktuar në detyrë. Ai është kah e shfrytëzon situatën sepse i ka pasur disa fotografi me Trumpin. Vetë fakti që ai nuk ka arritur të marrë detyra më të mëdha, më serioze, sikurse që ka pretenduar të jetë Sekretar i Shtetit [dmth. ministër i Jashtëm], tregon se ai ka probleme me shtetin amerikan vetvetiu, për arsye se nuk janë të sqaruara tamam lidhjet e tij me Serbinë, me politikanët të Serbisë dhe të Rusisë. Ka dyshime, që ndoshta, – ndoshta, sepse nuk kam fakte – mirëpo ka dyshime që ndoshta edhe është i korruptuar, për këtë arsye edhe nuk ka mundur të marrë pjesë në inaugurimin e presidentit Trump.
[…]
QORTIMI [NGA ANA E GRENELLIT] I KRYEMINISTRIT TË TASHËM, KURTI, ËSHTË I PAVEND DHE ËSHTË GABIM SHUMË I MADH.
Nuk është kurrgjë e jashtëzakonshme pse Grenelli takohet me Trumpin. Ka pasur disa fotografi në Kaliforni. Pati sukses në Venezuelë për lirimin e pengjeve. Unë mendoj që në këtë moment nuk duhet ta marrim emisarin Grenell si përfaqësues për çashtjen e Kosovës ende. Nuk është ende i caktuar. Prandaj ai nuk ka të drejtë të flasë. Përzierja e tij dhe deklaratat e tij lidhur me zgjedhjet në Kosovë, edhe qortimi i kryeministrit të tashëm, Kurti, është i pavend dhe është gabim shumë i madh. Gjë që tregon edhe karakterin e tij, sepse ai edhe përpara si një ambasador në Gjermani, u largua nga Gjermani me kërkesën e Gjermanisë për arsye se ka qenë jodiplomati, mos të them edhe arrogant i skajshëm. Edhe më vonë tregon tendenca jodiplomatike.
GRENELLI I KA SHUMË BORXH SERBISË
Ky [Grenelli] i ka shumë borxh Serbisë, sepse duket se ka krijuar disa marrëdhënie speciale në Serbi. Nuk e di se çka konkretisht. Ekzistojnë konspiracione të ndryshme, por nuk dua të merrem me to. Mirëpo është i influencuar nga Serbia: shkurt e trup. Është duke e përfaqësuar atë. Ai ka shkuar… derisa ua uron serbëve Vidovdanin, pa e ditur se çfarë përfaqëson Vidovdani, pa ditur gjë për atë punë. Historinë e Amerikës nuk e di, e lëre më atë të vendeve ballkanike. Prandaj, ai e ka marrë anën e Serbisë. Domethënë, nuk është më i paanshëm. Nëse ti do të jesh mediator në një konflikt minimumi do të duhej të ishe publikisht i paanshëm. Në prapavijë ndoshta edhe mund të jetë i anshëm, por publikisht duhet të tregohet i paanshëm. Ky e ka kaluar atë fazë. Kështu që unë besoj dhe shpresoj që presidenti Trump nuk do t’ia japë mundësinë këtij që të ndërmjetësojë në problemet mes Kosovës dhe Serbisë.»
(Përgatiti A.M.)