(Emri i qytetit të lashtë Pella, nuk ka asnjë kuptim në gjuhën e vjetër greke, as në gjuhën e re greke dhe në gjuhët sllave, siç nuk kanë kuptim në ato gjuhë edhe emrat me rrënjë të njëjtë: Pellazg, Pellagon, Pellagoni, Pelion, Pella etj.)
Çfarë kanë të përbashkët përveç emrit, qyteti antik Pella në krahinën e sotme të Maqedonisë (Emadhia) në Greqi dhe qyteti antik Pella në Jordani: prejardhjen e njëjtë të emrit, themeluesit dhe sundimtarët e njëjtë, apo edhe diçka tjetër, që pasqyrohet përmes elementeve në stemën e Mbretërisë së sotme të Jordanisë, shqiponjës dhe diellit të Virgjinës?
Sipas një varianti, etimologjia (prejardhja) e emrit të qytetit Pella, mund të lidhet me emrin e mbretit Pella (Peleu), nga një fis i lashtë i Maqedhonisë (Emadhia) antike.*)
Sipas Homerit, Akili (lat. Achilles), heroi më guximtar në luftën e Trojës, ka qenë i biri i Peleut dhe Thetit, perëndeshës pellazge të lumejve dhe detrave. Sipas mitologjisë së vjetër thuhet se edhe Aleksandri (Leka i Madh) ka pasur lidhje familjare me Akilin, nëpërmjet të ëmës, Olimpia, gruaja e Filipit dhe princesha e Epirit.
Nuk duhet të hamendemi që ky emër e ka burimin nga gjuha shqipe (përkatësisht gjuha e lashtë pellazge dhe më vonë ilire), rrënja e fjalës: PELLË-A, PJELLË-A, që domethënë, pjellë (fëmijë), e lindur, pasardhës, pjellori, plleshmëri etj. Këtë emër qyteti mund ta ketë marrë në bazë të emrit të fushës pjellore ku është ndërtuar ky qytet. Këtë variant e përforcojnë edhe shumë emra të tjerë vendesh në hapësirën ilire-shqiptare, siç është emri i një fushe të madhe dhe pjellore (dikur krahinë e Ilirisë së Poshtme) me emrin Pellagoni, emër që edhe aktualisht e mban kjo fushë në pjesën veri-perëndimore të Maqedhonisë së sotme.
Në shumë të folme të gjuhës shqipe, si në zonat e thella të Malësisë së Sharrit edhe sot përdoret varianti i kësaj fjale: pellë-a, jo pjellë-a.
Ky variant është shumë më i besueshëm se varienti i disa studiuesve, të cilët emrin e këtij qyteti e lidhin me kuptimet e fjalës rrethojë (prej guri), vatha e dhenve etj.
Me këtë rast, duhet të theksojmë se qyteti antik me emrin Pella në Jordani, është më i ri se qyteti antik Pella në krahinën e Maqedhonisë (Emadhia) në Greqinë e sotme, i cili besohet se është ndërtuar pas pushtimeve nga Leka i Madh.