Secili e secila ka të drejtë të protestojë, dhe qytetarët kanë të drejtë të kërkojnë siguri dhe drejtësi. Por para se të bllokojmë rrugët e nughsta dhe të pengojmë jetën e qytetarëve të zakonshëm, duhet ta qesim gishtin n’kry dhe të pyesim: Ku buron kjo dhunë e tmershme?
Të dashurë lexues,
Dhuna nuk lind nga asgjëja. Ajo nuk zbret nga qielli si ndonjë mallkim hyjnor. Përkundrazi, ajo kultivohet dhe ushqehet çdo ditë në mediat tona; në televizion, në radio, në portale. Analistët, si të çartur, bërtasin, ulurisin, pështyjnë dhe kërcënojnë, gazetarët provokojnë, redaktorët lejojnë një gjuhë të ndyrë, agresive dhe ofenduese. Spektakli i britmave dhe shpotitjeve është bërë normaliteti ynë tragjik. E këtu formësohet fëmiu ynë, rinia jonë, familja jonë!
Kjo është dhuna e parë, ajo që nxit dhunën fizike në rrugë.
Si mund të presim që njerëzit të mos e zgjidhin një mosmarrëveshje me grushta, kur çdo mbrëmje e kalojnë duke parë përplasje primitive mes analistëve që çirren, poshtërojnë dhe kërcënojnë njëri-tjetrin? Si mund të presim që të rinjtë të respektojnë jetën, kur e vetmja gjë që u servohet është arroganca, dhuna, agresiviteti, tensoni dhe përçmimi?
Dhe mos të harrojmë shkakun tjetër të dhunës: mungesa e arsimit dhe edukimit. Prej më shumë se 30 vitesh, në këto hapësira arsimi është degraduar, shkollat janë shkatërruar, librat janë zhveshur nga vlerat. A mund të presim një shoqëri të sigurt kur kemi një brez që rritet me injorancë dhe frustrim? A mund të presim më mirë ku kemi një rini që po (keq)ushqehet me Bigbrothera, me tekste e filma plot dhunë?
Të nderuarë lexues,
Dhuna sot po përdoret për politikë ditore. Ajo bëhet mjet për të manipuluar njerëzit, për të krijuar panikë, për të mbajtur një popull të zemëruar dhe të lodhur. Ky është turp! Nëse duam të protestojmë kundër dhunës, le ta fillojmë nga rrënjët e saj; nga gjuha, nga mediat, nga gazetarët, nga (pa)kryeredaktorët nga shkollat e çoroditura.
Përndryshe, të dashur lexues, çdo protestë mbetet vetëm një çlirim momental dhe mjet politik ditor, ndërsa dhuna vazhdon të mbetet rregulli i pashkruar në hapsirat shqiptare.