Sot Kombi Shqiptar ka humbur një nga shtyllat e tij më të forta intelektuale, njeriun që për më shumë se gjysmë shekulli shërbeu si busull e identitetit shqiptar, historisë, kritikës dhe shkencës sonë të letërsisë. Rexhep Qosja nuk ishte thjesht një akademik; ai ishte “Habermasi” ynë, zëri që guxoi të dekodonte të vërtetat e dhimbshme dhe të mbronte me dinjitet të drejtën shqiptare për të qenë vetvetja në sytë e botës.

Me ikjen e tij, mbyllet një epokë e artë e mendimit kritik. Qosja na la trashëgim jo vetëm vepra monumentale, por edhe modelin e intelektualit humanist që nuk u thye para stuhive politike dhe nuk u njollos nga urrejtja, duke qëndruar gjithmonë mbi thjeshtëzimet eurocentrike dhe paragjykimet ballkanike. Ai na mësoi se si të jemi evropianë duke mbetur shqiptarë, dhe se si ta duam tjetrin pa mohuar rrënjët tona shqiptare.

Kërkesë për Nderim Kombëtar:

Përpara kësaj humbjeje të madhe që prek mbarë botën shqiptare, i bëjë thirrje institucioneve më të larta shtetërore:

1. Qeverisë së Republikës së Kosovës dhe Qeverisë së Republikës së Shqipërisë që të shpallin menjëherë 3 ditë zie kombëtare në nderim të figurës së Akademik Rexhep Qosjes.

2. Flamujt të ulen në gjysmështizë në të gjitha institucionet brenda dhe jashtë vendit, si shenjë mirënjohjeje për njeriun që e bëri shkencën dhe kulturën tonë të flasë me zërin e arsyes dhe të drejtësisë.

I përjetshëm qoftë kujtimi dhe vepra e Prof. Rexhep Qosjes! Shqiptaria sot është më e varfër, por trashëgimia e tij do të ndriçojë rrugën e gjeneratave që vijnë.

U prehsh në paqe, Mjeshtër i Madh!