NGA KUJTIMET E MIA?!

18
May
2023

Shkruan: Fadil Shyti

Në muajin Tetor të vitit 1979 isha në vizitë në shtetin amë,- në RPSSH.
Ishim me një grup shoqesh dhe shokësh studentë po bisedonim me njërin nga profesorët USHT i cili quhej, Dedë Preka, po bisedonim ashtu, në një bisedë të lirë, për Gjuhën Shqipe për zhvillimin e saj në etapa të ndryshme etj, Ay, veç tjerash na tha:
“Gjuha Shqipe nuk do të bëhej aq e njohur në Evropë, as në botë nuk do të bëhej e njohur, e përparuar si gjuhë e lashtë indo-evropiane, pa lëvrimin e saj, nga gjuhëtari austriak, Norbert Jokli dhe nga gjuhëtari gjerman, Gustav Majer e të tjerë.
-Mirëpo, lexuesit shqiptarë duhet ta dinë një fakt: kush i ndihmoi këta gjuhëtarë, shkencëtarë të mirëfilltë të huaj, për t’u marrë me kaq seriozitet dhe përkushtim me Gjuhën Shqipe: ishte burri mendjendritur, gjuhëtari elbasanas, njohës shumë i zoti i dy dialekteve të shqipes gegë e toskë dhe i të folmes së elbasanishtes, të Shqipërisë së Mesme, ishte i madhi Konstandin Kristoforidhi.
-Ky korife i shqipes sonë të bukur të lashtë e të re, jetonte në kushte vështira materiale, në një kasolle të vjetër dhe meqë ishte trupgjatë, mezi hynte në derë të saj dhe kur hynte brenda i duhej të kërrusej, sepse tavani i saj i ulët nuk i jepte mundësi të ngriste lart trupin as kokën”.
-Ja, të nderuar lexues!
Shiheni pra, sa shumë sakrifica kanë bërë rilindësit tanë, për Gjuhën Shqipe, për Flamurin Kuqezi, për këtë të uruar Shqipëri.
-Shumë vite më vonë, më ka rastisur të dëgjoja në TVSH, një historian, nuk më kujtohet saktë cili ishte, Pëllumb Xhufi, apo ndonjë tjetër, ay midis tjerash tha: “Konstandin Kristoforidhi e ka shitur shtëpinë e tij dhe madje edhe ka hyrë në borxhe, ka marrë kredi, për të financuar shkencëtarët e cekur më lart dhe të tjerë, për t’i përkthyer librat e tyre,-por, edhe për t’i botuar librat e tij studiuese, për dialektet e shqipes sonë”.

Lavdi kolosit të letrave shqipe, i cili nga shkencëtarët tanë dhe opinioni përparimtarë shqiptar, me të drejtë, me krenari të ligjshme quhet, “Babai i Gjuhës Shqipe”.
Lavdi atdhetarit tonë të madh, Konstantin Kristoforidhi!
Lavdi dhe miqve tanë të vërtetë, gjuhëtarëve të lartcekur e të tjerë që e pasuruan krijimtarinë e tyre dhe e çuan përpara shkencën shqiptare me punët e tyre titanike në shërbim të Gjuhës Shqipe dhe të kombit shqiptar!
16 maj 2023

Shënim:
Redaksia, diplomacia. dk nuk e merr përgjegjësinë për pikëpamjet e autorit në shkrimin e botuar!
Respekt!

Kategoria:

Botuar: 18/05/2023

© 2016 - 2024 | DIPLOMACIA.dk