Si veprimtar politik në mërgim e kam përkrahur dhe vazhimisht e përkrahi Albinin dhe Lëvizjen Vetëvendosje.

-Që nga formimi i Lëvizjes Vetëvendosje në vitin 2005, e kam përkrahur vazhdimisht dhe u kam sugjeruar shokëve që ta mbështesin këtë Lëvizje përparimtare. Për mua, ka qenë dhe mbetet e vetmja Organizatë politike që e ka të qartë në programin e saj, çështjen e bashkimit kombëtar.

Shpesh e kam kujtuar shembullin e Helmut Kohl-it, ish-kancelarit gjerman të CDU-së, i cili e kishte ribashkimin e Gjermanisë në program: me mjete paqësore apo me kosto materiale, por patjetër, gjermanët si ai, donin ta ribashkonin vendin.

 -Edhe ne shqiptarët, kemi pasur burra shteti që kanë përgatitur programe për ribashkimin e kombit dhe të trojeve tona etnike.

Pas luftës heroike të UÇK-së dhe intervenimit të faktorëve ndërkombëtarë (UNMIK dhe EULEX), si dhe me veprimet e disa partive politike, para e pas luftës, u ndërtua një kurs prapakthimesh politike; shpesh në kundërshtim me interesat shqiptare.

U krijua një “Kushtetutë e Kosovës” që, në shumë aspekte, i  mohoi vlerat dhe simbolet tona kombëtare; madje Komandantët që ishin betuar nën flamurin kuq e zi, nuk bën as më të voglën rezistencë, përballë miqve të Serbisë, kur e hartuan Kushtetutën e Kosovës, e cila është në disfavor katastrofal për shqiptarët.

Këto parti politike, pa fije turpi, krejt palogjikshëm, nisën dialogun në Vjenë e në Bruksel?!!!

Lëvizja Vetëvendosje ishte kundër dialogut prapakthyes, i demaskoi këto “zgjidhje” me parullën e famshme “Jo negociata, Vetëvendosje”!…

Kjo parullë u mishërua te rinia e më pas te i gjithë populli. Si rrjedhojë, LVV dhe Albin Kurti fituan zgjedhjet dhe ndoqën një politikë sociale në dobi të popullit të varfër e të mashtruar nga partitë e vjetra të opozitës, të cilat për më shumë se 20 vjet nuk u interesuan fare për fatin e popullit, por u tallën me të…

Negociatat e tyre shkuan deri te falja e e territoreve  shqiptare (p.sh. toka të Dabëlldenit iu dhanë Maqedonisë, Çakorri, Bjelluha e vise të tjera, që iu dhanë Malit të Zi. Dhe, për të kënaqur orekset pushtuese të Serbisë, u bën plane si lobimi për ndarjen e Kosovës me Serbinë gjenocidale.

-Këto nuk janë insinuata: funksionarë të opozitës i kanë artikuluar publikisht, në intervista dhe me deklarata të shumta.

Është e domosdoshme të theksohet se, Albin Kurti nuk bën “dialog” me Serbinë fashiste e gjenocidiale, por dialogon me Bashkimin Evropian, i cili ka marrë përsipër ndërmjetësimin e dialogut mes Republikës së Kosovës dhe Serbisë.

Janë për t’u vlerësuar qëndrimet e qarta kombëtare dhe demokratike: me qetësi e kulturë politike, dhe me qindra argumente, ai mbron të drejtën për vetëvendosje dhe parimin e reciprocitetit me të drejtat e shqiptarëve në Kosovën Lindore.

Vlen të theksohet dhe deklarata e tij si kryeministër i Kosovës: “Ne jemi një komb dhe dy republika”. Kjo thënie, e mençur dhe diplomatike, është një goditje për politikat e vjetra të “jesmenëve” dhe miqve të tyre ndërkombëtarë. Jam përkrahës, për të gjitha këto arsye dhe për shumë veprimtari të tjera në shërbime të atdheut.

5. 06. 2026